تركيب سيراميك الارضية بنفسك
  • Save

Last updated on أغسطس 22nd, 2023 at 04:15 م

السيراميك هو الخامة المفضلة عند ناس كتير للارضية وده بسبب سعره المعقول ومقاومته العالية جدا للمياه وقوة تحملة للظروف القاسية وطبعا شكله الجمالى وده اللى خلى تركيب سيراميك الارضية شائع ومنتشر جدا حتى ان بعض الناس فى الدول العربية وكتير فى البلاد الاجنبية بيعمله بنفسه.

طبعا كتير مننا لما بيجى يبلط ارضية بيته بيجيب صنايعى محترف يقوم له بالموضوع ده ، لكن احنا هنا هنعرف ان تركيب سيراميك الارضية مش معقد ولا حاجة بالعكس ده موضوع بسيط لو اتبعت شوية الخطوات والتعليمات اللى هنوضحها.

زمان كان فيه حكمة مشهورة الناس بتقولها وهى ان ظبط الشغل اهم من الشغل يعنى ايه ؟؟ يعنى عشان تركب سيراميك بنفسك وميبقاش فيه غلطة لازم تجهز المادة اللى هتلزق بيها وتنظف المكان اللى هتشتغل فيه وتجهز كل الأدوات اللى هتستخدمها.

ساعتها هتلاقى ان تركيب سيراميك الارضية والتخويض اللى هو عمل الفواصل البينية بين البلاط فى منتهى البساطة.

الادوات اللى هتحتاجها

  • منشار تقطيع السيراميك وده عندك فيه حل من اتنين اختار اللى يناسبك إما المنشار الكهربائي أو المنشار اليدوى.
  • كماشة سيراميك لازالة الاجزاء الزائدة.
  • فرطاسة محارة من المطاط عشان الفواصل البينية بين السيراميك.
  • مالج مشرشر لعمل تعرجات الاسمنت لتوزيع المونة بشكل متساوى.
  • مسطرين عادي وممكن المالج المشرشر يغنيك عن المسطرين العادى.
  • دقماق كاوتش (شاكوش بمطرقة كاوتش) عشان احكام البلاطة.
  • قطعة اسفنج كبيرة.
  • متر شريط.
  • خيط علام.
  • ميزان مياه وطبعا فيه منه العادى والديجيتال.
  • زاوية قائمة.
  • فواصل السيراميك.
  • جوانتى مطاط.
  •  

الخامات اللى هتحتاجها

  • السيراميك اللى هتركبه.
  • مادة اللزق سواء كانت مونة اسمنتية او المادة المشتقة منها ودى بتكون شكاير تتباع جاهزة معروفة باسم مادة لزق السيراميك.
  • عازل التخويض سواء كان اسمنت ابيض او مادة عزل جاهزة.

حدد شكل ترتيب السيراميك

حدد شكل تركيب سيراميك الارضية عمودى ولا قطرى
  • Save
Elena Elisseeva/shutterstock

قبل ما تفكر فى تركيب سيراميك الارضية لازم الاول نشوف احتياطات تركيب السيراميك زى نظافة الارضية الخرسانة اللى هتلزق عليها بعد كده لازم تشوف هتركب السيراميك ازاى عمودى ولا قطرى.

الشكل العمودي يعتبر أسهل الحلول لانك مش هتحتاج انك تقطع سيراميك كتير ده غير انك مش هتجهد نفسك فى حساب كمية السيراميك المطلوبة لانك هتاخد المساحة وتشترى على أساسها لكن يعتبر شكل الارضية نمطى.

على الجانب الآخر الشكل القطرى مميز وبيعطى اتساع للمكان الضيق لكنه محتاج شوية مجهود فى حسابه لما تشوف المساحة لازم تزود عليها على الاقل 15% عشان تعمل حسابك على كمية البلاط المهدور اللى هيطلع من التقطيع ده غير ان عملية التقطيع نفسها هتكون متعبة بالنسبة لك شوية.

وطبعا متنساش انك تبلل السيراميك فى مياه لانك لو معملتش كده السيراميك هيسحب المياه الموجودة في المونة بسرعة جدا لان فيه حرارة ناتجة عن تصنيعه داخل افران بدرجة حرارة عالية.

جهز مادة اللصق

تجهيز مونة او مادة لزق السيراميك
  • Save
Thn K Vt Phu Ceriy / EyeEm/gettyimages

خامة السيراميك نفسها قابلة للكسر يعنى لو مسكتها بايدك وحاولت تكسرها هتتكسر لكنها تكتسب قوتها من وجودها على سطح صلب غير مرن بدون أي حفر أو نتوءات ، وممكن تركيب سيراميك الارضية يكون فوق باركيه خشب او على ارضية فينيل او مشمع بلاستيك مش شرط تكون خرسانة بس.

تعتبر الالواح الاسمنتية خلفية ممتازة تقدر تركب عليها السيراميك وانت مطمن لانه ببساطة عبارة عن لوح أسمنتي يشبه لوح MDF بتركبه على الارضية مباشرة او حتى على الحيطة وبالتالى مش هتحتاج تظبيط للبلاط كتير لانه سطح مستوى تماما.

عشان تركب الالواح الاسمنتية دى تربطها بمسامير على مسافة 20 سم بين كل مسمار واللى بعده على الدوران الخارجي للوح نفسه عشان يكون مثبت كويس والصق الفواصل بين الالواح بشريط لاصق من الفايبر جلاس ، واملأ الفراغات دى بمونة لصق السيراميك وسيبها وقت كافى عشان تجف قبل تركيب سيراميك الارضية .

رتب السيراميك قبل تركيبه

ارفع مقاسات كل حيطة عندك عشان تقدر تحدد نقطة المنتصف ، وامسك خيط العلام اللى فيه حبر واعمل خطين متقاطعين في الغرفة عشان توصل لنقطة المنتصف بالظبط.

بدون اى مونة أو مادة لزق ، رص السيراميك فى الغرفة على كل حيطة من حوائط التقاطع اللى رسمته ، الفكرة من عمل الموضوع ده هو انك متلاقيش بعد التركيب قطع صغيرة ناحية الحيطة لان شكلها بيكون مش حلو.

هتقولى طب وهظبط السيراميك ازاى هقولك بمنتهى البساطة حرك نقطة المنتصف اللى رسمتها بالخيط لاى اتجاه ساعتها هيتحرك معاك السيراميك كله.

وابدأ شوف اى اتجاه انت اتحركت فيه وكان البلاط مظبوط ، اول ما توصل لنقطة ويكون فيها السيراميك كامل حافته لامسة الحيطة مش متقطع او على الاقل يكون بلاطة السيراميك فى نصفها بدل ما يتبقى قطعة صغيرة تبقى هى النقطة دى.

وزع مادة تركيب سيراميك الارضية

توزيع المونة عشان تركيب سيراميك الارضية يكون صح
  • Save
alexandrumagurean/gettyimages

امسك المسطرين وهات كمية من المونة أو مادة لزق السيراميك اللى انت جهزتها بالمياه وافردهم على سطح الأرضية بحيث تبقى ممتدة لمساحة البلاطة بالكامل وتزيد عنها بشوية.

امسك المالج المشرشر واعمل خطوط بزاوية 45 درجة على الاسمنت المفرود على الارض والسنان المشرشرة هى اللى هتقوم بتسوية المونة لوحدها من غير مجهود منك.

ركب البلاطة

تركيب سيراميك الارضية بهدوء
  • Save
Petko Ninov/gettyimages

امسك البلاطة بهدوء واضغط بيها على المونة فى الاتجاه اللى تحس انها عالية فيه او مش مظبوطة ده كله بهدف انك تفرغ اى هواء او مطبات تحت البلاطة نفسها عشان متلاقيش البلاطة فرقعت واتفكت بعد فترة.

ودى اهم خطوة فى تركيب سيراميك الارضية وعشان تتأكد انها بقت مغطية الاسمنت كويس ومفيش فيها هواء ارفعها من اى زاوية لو كانت قوية مرفعتش تبقى اتركبت مظبوط.

وانت شغال فى تركيب سيراميك الارضية خلى بالك متنساش الفواصل البلاستيك بين البلاطات وبعضها عشان المسافات تكون متساوية بالظبط متلاقيش اختلافات.

وطبعا اهم نقطة ان تتأكد من مستوى السيراميك بميزان المياه لازم يكون مسطرة مفيهوش غلطة ولو لقيت ميول من زاوية معينة تدق عليها بالدقماق الكاوتش هيظبطها لك تمام لحد ما يبقى كل السيراميك مستوى.

وانت بتركب السيراميك سيب 5 مم جمب حوائط الغرفة مباشرة خليهم فاضيين مترميش فيهم مونة خالص متقلقش دول لهم وظيفة هنقولها.

تقطيع السيراميك

تقطسع السيراميك بحذر مع لبس النظارة الواقية
  • Save
Petko Ninov/gettyimages

عشان تقطع السيراميك ممكن تستعمل المقص اليدوى سواء هتشتريه او حتى ممكن تأجره من محلات تأجير المعدات ، وانت بتقطع خلى الاجزاء اللى فيها تشوهات شوية ناحية الحيطة وفى النهاية الوزرات هتغطيها أو استعمل الكماشة لو هتحب تقطع دورانات زى التقطيع عشان التواليت او المواسير فى الحيطة او لاى تقطيع مش مستقيم.

ونصيحة من الخبراء وانت بتقطع السيراميك البس النظارة الواقية عشان الرايش ميطيرش عليك لانه خطر جدا ممكن يجرحك او يدخل فى عينيك.

تخويض السيراميك

تخويض السيراميك بعد التركيب
  • Save
yunava1/stock.adobe

كلمة التخويض في لغة السوق معناها ملىء الفراغات بين البلاطات وبعضها باسمنت ابيض او باى مادة تصلح للغرض ده وده بتعمله بعد ما تخلص تركيب سيراميك الارضية وتشيل الفواصل البلاستيك تبدأ تملأ الفراغات بفرطاسة المحارة البلاستيك.

امسك الفرطاسة بزاوية 45 درجة وهات المادة اللى هتملا بيها الفراغات دى وابدأ فى عملية الملء ومتتحركش بشكل افقى او راسى عشان المادة متخرجش بره الفتحات دى واللى يتبقى منك رجعه تانى.

بعد ما تخلص العملية دى بحوالى ساعة هيكون المادة جفت الى حد كبير تمسك اسفنجة مبللة بمياه نظيفة وتمسح الفواصل دى بحركات دائرية عشان تشيل البواقى الموجودة.

امسح اى بقع بيضاء

تنظيف السيراميك بعد التخويض
  • Save
gilaxia/gettyimages

بعد ما هتخلص عملية التخويض ويجف الاسمنت الموجود فيها هتلاحظ وجود بقع بيضاء مكان ما انت مشيت بالفرطاسة البلاستيك لازم تمسك الاسفنجة و تبللها مياه نظيفة أو بمحلول ينصح باستخدامه لازالة البقع دى وده بيكون مكتوب على تعليمات السيراميك نفسه.

اعزل التخويض

فواصل السيراميك المعمولة بمادة اسمنتية هتمتص المياه لو متمش عزلها بشكل كويس وده هيخلى المياه تدخل تحت السيراميك مع مرور السنين.

ممكن تعزل الفواصل دى بحاجة من اثنين الاولى انك تعزل الفواصل نفسها بفرشة ومادة عزل او انك تجيب مادة العزل دى جاهزة فى علب سبراى وترش على الارضية بالكامل وتمسح اللى يتبقى على سطح السيراميك نفسه.

مصادر الصور

الغلاف green_casius/gettyimages

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *