ازاى تختار مقابض ابواب واكر غرف بيتك

ازاى تختار مقابض ابواب بيتك

اختيار مقابض ابواب الغرف فى بيتك ممكن يحول الباب من مجرد قطعة خشب من الاحتياجات الأساسية لتحفة فنية فى كل غرفة.

هنتعرف مع بعض فى الموضوع ده على على الانماط والاشكال المختلفة لمقابض الابواب والاكر وازاى تقدر تكمل بيهم ديكور بيتك سواء كانوا فى غرفة او فى الباب الرئيسى فى المدخل.

طبعا مفيش باب يكتمل شكله النهائى بدون مقبض يعطى له رونق ، لأنه بجانب وظيفته فى الفتح والقفل يعتبر بمثابة قطعة جوهرة فى الغرفة وده من خلال ربط شكل الباب مع بعضه كوحدة واحدة فى التصميم.

لان الباب لو اصبح قطعة واحدة من الخشب هيكون شكله ممل ، ومن هنا ظهرت اهمية مقابض ابواب الغرف فى التصميم ، ومش بس كده ده هو الوسيلة الوحيدة اللى هتساعدك فى المرور بين الغرف وبعضها.

برغم ان مقابض ابواب البيت هى قطع صغيرة ومش كتير بيركز عليها الا انها محتاجة تأنى فى الاختيار عشان تتناسب مع شكل الباب الخشب.

بالاضافة الى انها تؤدى الغرض المطلوب وتعيش أطول عمر افتراضي ممكن وتناسب المهمة اللى اتعملت عشانها و تناسب الاستخدام اليومي المتكرر.

في اختيارات كتير جدا موجودة من حيث الشكل والنوع والمقاس واكيد وانت بتدور فى السوق على مقابض ابواب هتختار الشكل اللى يكمل لك ديكور الباب نفسه ، هى دى اهم نقطة هتدور عليها ، لكن تبدأ منين ؟

عشان كده احنا هنعرض لك فى الموضوع ده الاشكال والانماط الموجودة وايه اشكال الابواب اللى ممكن تناسبها المقابض دى مع بعض النصائح اللى هتفيدك وانت بتختار.

مقابض ابواب عادية ولا اكرة رافعة

 

هنا بقى يجى الاختيار المهم اللى لازم تاخد فيه قرار وهو هل تختار مقابض ابواب عادية ولا اكرة بشكل الرافعة وخاصة أنه أصبح متوفر منهم اشكال كتير منها البسيط والمزخرف و اللامع والمطفي بكل اشكاله.

مقابض الابواب

مقبض باب كلاسيكى
happycreator/stock.adobe

هى الاقدم تاريخيا وتعتبر الاختيار الشائع والمنتشر إذا كنت بتدور على العمر الافتراضى لانها أجزائها الميكانيكية اقل من الاكرة الرافعة عشان كده عمرها طويل وده اللى خلى القائمين على تطويرها يحسنوا من أشكالها من حيث الخامة والشكل والتصميم عشان تتناسب مع اشكال وتصاميم الابواب سواء كانت مودرن او كلاسيك او اي نمط تانى.

الاكرة الرافعة

اكرة باب تعمل بالرافعة
mimacz/stock.adobe

النوع ده تم ابتكاره عشان يعطيك مساحة أكبر من التحكم فى القفل والفتح لانها من روافع النوع التانى وده يعتبر اقوى انواع الروافع عشان كده سميت اكرة رافعة بسبب ميكانيزم شغلها.

تتميز اكر الروافع أن شكلها يبدو موردن وحديث اكتر من المقابض العادية حتى مع تطور شكل المقابض الثابتة لكن ده شكله افخم وجديد.

الاختيار راجع ليك ولذوقك الشخصى وكمان شكل الباب وتصميمه و ده اللى هيخليك تحدد اذا كنت هتشتري المقبض التقليدى ولا اكرة الرافعة.

اشكال مقابض الأبواب والاكر

اكرة بوش خلفى

مقابض ابواب لها وش خلفى بطريقة كلاسيكية
Andrey Popov/stock.adobe

النوع ده من الاكر يناسب الأبواب الكلاسيكية اكتر لانه شكله معتاد وموجود بقاله فترة طويلة فى السوق.

اكرة على وش دائرى

مقابض ابواب لها وش دائرى وتسمى رزتة
dechevm/stock.adobe

النوع ده كان موجود من فترة كبيرة وكان له نفس الوش الدائري او المربع وبيسمى في لغة السوق روزتة وبدأ يرجع تانى بقوة بعد ما حصل له تطوير كبير وده بسبب ان شكله بسيط وينفع يتركب فى اماكن كتير يعنى له استخدامات متعددة.

يختلف شكل الروزتة على حسب تصميم الاكرة نفسها ممكن يبقى مربع او دائرة عشان يتناسق مع شكل الاكرة إذا كانت مودرن او كلاسيك او حتى اى نمط تانى.

مقبض كلاسيكى

مقابض ابواب كلاسيكية
offsuperphoto/stock.adobe

غالبا النوع ده بيستخدم فى الأبواب التقليدية و فى الاستايلات القديمة كانت هى الاكرة نفسها مكانش شكل الاكرة المعروفة حاليا يعنى كان لازم تلف المقبض يمين او شمال عشان تفتح او تقفل.

مقبض مودرن

مقابض ابواب مودرن من الاستانلس
geargodz/stock.adobe

وده طبعا شكله مستحدث كتير عن الشكل القديم عشان يناسب الابواب المودرن وهنلاحظ أن الزخرفة والحفر فيه قليل ومش بس كده ده كمان خامتها تطورت جدا مبقاش قاصر على المعدن ولكن اتعملت اليد من الزجاج او العاج واحيانا البورسلين والخشب.

ازاى تختار مقابض الابواب

 

عشان تختار مقابض ابواب صح فيه مجموعة نقط مهمة لازم تاخدها فى اعتبارك عشان متلاقيش نفسك صرفت على البند ده كتير وفى النهاية محصلتش على الشكل والوظيفة المرغوبة ، تعالى نشوف ايه العوامل دى.

تصميم و شكل الباب

 

شكل الباب نفسه والفنش المعمول فيه من أهم العوامل اللي بتأثر على اختيار المقابض والاكر.

باب الحشوات

باب من الحشوات يناسبه المقبض الكلاسيك
smartape/stock.adobe

النوع ده من الابواب موجود بكثرة فى بيوتنا القديمة وده بسبب انتشار طريقة التصنيع دى فى الوقت ده ، وهنلاحظ منها النوع اللى فيه 4 حشوات أو ستة واحيانا بيختلف عن كده على حسب شكل وتصميم الباب نفسه ، ولما نيجى نختار مقبض أو اكرة للنوع ده من الابواب نحاول نختار شكل كلاسيكى عشان يتناسق معاه.

باب القوائم الخشبية

مقبض باب من القوائم الخشبية
EwaStudio/stock.adobe

وده بيختلف المسمى الخاص بيه على حسب البلد الموجود فيها ، ميزة النوع ده من الابواب انه يمشى على الاماكن المودرن والكلاسيك يعنى ممكن تلاقى الاستايل ده من الابواب في البيوت القديمة وممكن تلاقيه فى اماكن مودرن ودى احنا نفذناها عند بعض العملاء في مطعم كان ستايله مودرن.

الباب المكبوس

باب خشب مكبوس يناسبه المقبض المودرن
Studio Trebuchet/stock.adobe

النوع ده من الابواب بيكون له طبقة خارجية تغلف خشبه الداخلى اما من الكونتر او الأبلكاش أو MDF على حسب التصنيع وهى اللى بتعطى الشكل الجمالى للباب نفسه لانها بتكون ملزوقة بطبقة من القشرة.

من ضمن انواع القشرة هنلاقى الارو ، الماهوجني ، الأبنوس و بيتش باين وانواع غيرهم كتير ودول بيكونوا متناسقين مع المقبض اليدوى اكتر من الاكر باختلاف شكل القشرة نفسها وطريقة الفنش المعمولة بيها.

الباب المدهون

الابواب الخشب المدهونة تناسب المقابض المودرن
SOMPETCH/stock.adobe

الأبواب المدهونة ظهرت كشكل بديل عن شكل القشرة لان لها مظهر عصرى مودرن جدا وفى نفس الوقت تعتبر حل اقتصادي لأن تكلفة القشرة ولزقها وتركيبها بيكون مكلف فى بعض الاوقات.

هنلاقى منه الابيض والرماديات والكحلى بدرجات كتير جدا سواء لامع او مطفى وفى الحالة دى اللى ينفع معاه اكتر هى الاكرة المودرن.

الأشخاص المستخدمين

مراعاة كبار السن وانت بتختار مقابض الابواب
kali9/gettyimages

اختيار مقابض الأبواب بيعتمد على استخدام كل باب فى بيتك وطبعا الشكل والاستايل المناسب لذوقك ، بعض الناس بتفضل المقابض العادية اكتر.

وبعض الناس بتفضل الاكر لان فيها ميزة مهمة وهي انها مناسبة للاستخدام بالنسبة لكبار السن والاطفال لان لو ركزنا أكثر هنلاقى ان المقبض العادي عبارة عن نص كرة عشان تفتح الباب او تقفله محتاج تلفه وبالتالى انت محتاج قوة عضلية اكتر ، لكن الاكرة مش محتاجة نفس المجهود ده.

طبيعة المكان والبيئة الموجود فيها الباب

مقبض الباب يتحمل الظروف الخارجية
xuanhuongho/stock.adobe

لو لفيت السوق او حتى بتدور على الانترنت هتلاقى مقابض ابواب واكر باشكال وانواع كتير جدا وطبعا كل نوع من دول له الباب اللى يناسبه والمكان اللى يناسبه عشان كده ممكن الاختيار ياخد معاك وقت اطول.

يعنى مثلا لما تلاقى مقبض باب لونه برونزي يشبه قطعة الانتيكة يبقى علطول من غير ما تفكر ده يناسب الباب الكلاسيكى فى مكان الوانه دافية زى النبيتى والاحمر  ، فى حين ان لو بيتك الوانه باردة زى الاخضر او الازرق يبقى انت محتاج مقابض أبواب من النيكل او الاستانلس او البورسلين.

لو انت موجود فى اماكن حارة أو استوائية او مكان مطل على البحر يبقى لازم تختار قطع تتحمل الظروف الموجودة زى الرطوبة والحرارة والمياه المالحة ، يعنى مش من المنطقى انك تشترى مقبض له يد خشب وانت بيتك مطل على البحر وفيه نسبة رطوبة لأنه بالتالى مش هيعيش كتير.

عشان كده بننصح باختيار القطع الاستانلس بالتحديد لانها الاكثر مقاومة للعوامل الجوية وكمان فى المساحات والغرف الداخلية اختار الاستانلس اللى له لمعة عالية جدا وهنا بقى نحب نوجه نصيحة مهمة ، ركز على ان الخامة تكون من الاستانلس مش حديد و مطلى نيكل لان الحديد المطلي هيتآكل ويصدى مع مرور الوقت.

الميزانية

 

آخر عنصر هتاخده فى اعتبارك هو الميزانية لان الاهم منه هى العوامل اللى قلناها ، عشان كده وانت بتجدد فى بيتك فى بند مقابض ابواب وشبابيك البيت هتلاقى نفسك بدأت تعمل حساب المعلومات الجديدة اللى قلناها فى الاول وتصرف عليها اكتر.

لازم تخلى بالك ان مقابض الابواب دى حاجة هتستخدم مئات المرات فى الشهر ، عشان كده لو فكرت فى منتج رخيص هتوفر فى الوقت الحالى شوية فلوس لكن بعد كده تأكد انك هتدفع اكتر لانه مش هيكون معمر بالنسبة لك و هتضطر تغيره.

بردو من النقط المهمة اللى تخليها فى اعتبارك انك لو اشتريت ابواب جاهزة من براند غالى مثلا يبقى مفيش داعى انك تشترى لها مقابض رخيصة لان ده هيقلل من قيمة وشكل الباب ، وزى ما هو معروف ان مدخل البيت او المكان اللى انت فيه بيزيد من قيمته بنسبة حوالي 10% إذا تم الاهتمام بيه بشكل كويس.

مصادر الصور

الغلاف golubsergei/stock.adobe

مواضيع ذات صلة

Leave a Comment