أفكار ديكورات خارجية لمنزلك

افكر عمل ديكورات خارجية فى بيتك

[lwptoc]

عشان تعمل ديكورات خارجية لازم تشوف الاول الديكور الداخلى فى بيتك لانه مكمل أو امتداد له ، كانوا زمان بيعملوا الاتنين شبه بعض خارج البيت وداخل البيت لكن دلوقتى معظم الناس بتغير وبتدور على الاختلاف عشان التجديد وكمان ميحسوش بالملل والزهق.

بس للاسف في ناس كتير بتهمل الجزء ده ومش بتفكر فيه بيشوفوا ان الترتيب والتنظيم يكون جوة البيت بس ومش مهم اى حاجة برة مع ان المكان هيكون اجمل واشيك لو تم الاهتمام بيه زى البلكونات والأسطح وكمان مدخل البيت.

عوامل لازم تراعيها وانت بتعمل ديكورات خارجية

المساحة

المساحة الخارجية مهمة فى الديكور
andi26/stock.adobe

طبعا المساحة هتفرق جدا فى اختيار الديكورات اللى هتتعمل فى المكان سواء من حيث الاثاث او الالوان وحتى تشطيب المكان نفسه لان اللى بينفع فى الاماكن الكبيرة مختلف تماما عن اللى بيكون فى الاماكن الصغيرة.

الإضاءة

الاضاءة الطبيعية تؤثر فى الديكورات الخارجية
Tom Merton/gettyimages

لازم تحدد اتجاه الشمس فى المكان عشان تشوف هل هتكون متواجدة بصورة كبيرة ولا لا ، وكمان فترة تواجدها ومدى قوة تأثيرها على المكان لا ده هيفرق معاك فى اختيار الاثاث وكمان لما تيجى تعمل برجولة خشب تعرف اتجاهها هيكون ازاى تبعا لاتجاه الشمس ، وكمان مهم جدا فى بند الإضاءة.

هتحتاج تزود اضاءة كتير عشان المكان يظهر وتكون القعدة مريحة للعين ولا اضاءة الشمس كفاية مع اضاءة اضافية بسيطة.

العوامل الجوية

العوامل الجوية تؤثر عند عمل ديكورات خارجية
PeopleImages/gettyimages

لازم تعرف اتجاه المكان إذا كان شرقى ولا غربى ، ودرجة الحرارة فيه كام تقريبا ، طب تيار الهواء قوى ولا ضعيف واتجاهه فين ، هل فيه رطوبة ولا مفيش ، كل دى حاجات مهمة لازم تكون فى اعتبارك وانت بتعمل ديكورات خارجية عشان تختار كل حاجة على اساس مظبوط و متحتاجش كل شوية تغير او تجدد.

أماكن الديكورات الخارجية

المدخل الرئيسي

لعمل ديكورات خارجية لازم تهتم بمدخل بيتك
ShutterWorx/gettyimages

مدخل البيت وحديقته دى اول حاجة العين بتقع عليها وعشان كده ناس كتير بتهتم بيهم وتحاول تخلى شكلهم شيك ومميز مش بس عشان الضيوف لا كمان عشانهم شخصيا لان المنظر الجميل فى الحديقة اكيد بيأثر فى الحالة المزاجية ويخليها احسن.

فيه ناس بتفضل أن المدخل يكون بسيط وهادى والوانه بسيطة وفاتحة زى اللبنى او الاخضر والاصفر وناس تانية بتفضل الألوان الغامقة زي الأسود أو البني وممكن كمان يبقى فيها شغل كلاسيكى ، كل ده على حسب ذوق كل واحد وميوله.

باب البيت

باب بيتك لازم يكون شكله انيق وشيك
lillisphotography/gettyimages

ممكن تعمل الوان الباب هادية وفاتحة او تعملها غامقة ولازم طبعا تكون متناسقة مع ستايل البيت نفسه سواء مودرن او كلاسيك او اى ستايل تانى وتقدر تزود او تضيف على الباب تابلوه خشب او ورود او اشكال محفورة او مكتوب عليها عبارات ترحيب.

وبردو تقدر تعمل ديكورات خارجية على السلالم زى لمبات صغيرة تعمل بيها اضاءة بسيطة مع اوانى زرع متوزعة عليها هتعمل منظر جمالى رائع.

واجهة البيت

خامة واجهة بيتك لاظهار الديكور الخارجى
EricVega/gettyimages

ديكور الواجهة اكيد هيكون مرتبط بالديكور الداخلى للمكان يعنى لو المكان كلاسيك يبقى الواجهة هتكون كلاسيك بالوان هادية زى البيج مع البني او رخام مع قطع GRP للزخرفة مع عمل بانوهات يعنى تابلوهات مزخرفة جواها.

ولو ديكور البيت مودرن يبقى الواجهة هتكون مودرن بالوان جديدة وعصرية زى الرماديات مع الابيض او استخدام حجر المايكا وممكن عمل بانوهات مربعة لكن بدون أي زخارف مع عمل اضاءة من أماكن غير تقليدية زى الواجهات الكلاسيك.

حديقة البيت

حديقة المنزل اهم عنصر فى عمل ديكورات خارجية
IP Galanternik D.U./gettyimages

هتختلف الامكانيات والادوات اللى هتكون فى المكان بناء على المساحة المتوفرة يعنى لو المساحة كبيرة ادامك مجموعة كبيرة جدا من الاختيارات ممكن تعملها :

  • تقدر تعمل برجولة فى وسط الحديقة أو على جانب منها وتكون متغطية بالزرع من فوق ومن الجوانب وتحط فيها كنب وكراسى مع ترابيزة وبكده هتكون مكان جميل للقعدة والانسجام.
  • لو بتحب النباتات والزرع ممكن تعمل دولاب من الزجاج وتحط فيه النباتات اللى بتحبها وتهتم بيها وبنموها هيكون منظرها شيك جدا.
  • ممكن تعمل حمام سباحة كبير او متوسط على حسب المساحة المتوفرة هيبقى ممتع جدا وقت الصيف.
  • ممكن تغطى جزء من الارضية نجيلة عشان تعطى احساس بالاتساع وممكن تعمل الحديقة على شكل درج او سلم مكون من كذا درجة وتخلى كل عنصر فى درجة منهم يعنى مثلا حمام السباحة فى درجة والبرجولة فى درجة وجلسة استراحة في درجة.
  • وطبعا حاول انك تزود الاجزاء اللى فيها نجيلة خضراء وتقلل الأجزاء الصلبة إلى حد ما اللى هى زى الزلط و الاسفلت والخرسانة لان زى ما احنا عارفين ان المواد دى تحتفظ بالحرارة وبتسخن جو الحديقة.
  • وتقدر تعمل نافورة صغيرة حواليها زرع جميل بيكون منظرها رائع.
  • تقدر تستعين بالتحف الفنية لو انت من محبيها وتعمل بيها منظر جميل فى المدخل أو الحديقة كشكل غير تقليدى.
  • وتقدر كمان تعمل منطقة باربيكيو (شواء) سواء ثابتة أو متحركة على حسب مساحة المكان وتستمتع بالطعام مع العيلة فى الهواء الطلق.

سطح البيت

ديكور سطح بيتك لعمل قعدة مريحة
fotografixx/gettyimages

كتير مننا بيهمل سطح البيت تماما وبيبقى بالنسبة له عبارة عن مكان لتخزين كراكيب او اغراض قديمة ولكنه فى الحقيقة ممكن يستغل استغلال مثالى وخاصة لو مفيش عندك مساحة خارجية للبيت وعايز تعمل ديكورات خارجية تقدر تعمل منظر جميل وقعدة مريحة على السطح (الرووف) وتستمتع بجو جميل.

تقدر تعمل حديقة عبارة عن احواض زرع فى كل جوانب السطح وتكون الارضية نجيلة مع ترابيزة وشوية كراسى وتبقى القعدة ممتعة.

لو مساحة السطح كبيرة تقدر تعمل سقف خشب فى ركن من السطح وتعمل فيه قعدة خاصة لمشاهدة التلفزيون في أوقات السهرة مع اضاءة مخفية وتكون سهرة سينمائية جميلة.

تقدر كمان تعمل ترابيزة سفرة كبيرة تجمع فيها العيلة وقت اللمة مع تخصيص منطقة للشواء (الباربيكيو) او مطبخ حجرى لعمل وجبات الطعام وسط لمة العيلة فى الهواء الطلق.

البلكونة

احسن اماكن عمل ديكورات خارجية هى البلكونة
Patrizia Tilly/stock.adobe

البلكونة مكان جميل وللاسف عند معظم الناس بتكون مساحة غير مستغلة من البيت مش لازم نخليها مخزن للكراكيب أو مكان لتخزين الخضار بالعكس ممكن نهتم بيها وتكون هى دى مكان الاستجمام والاستمتاع.

مش شرط تكون المساحة كبيرة عشان تقدر تعمل كده لا كمان المساحات الصغيرة تقدر ترتبها وتنظمها وتخلي شكلها جميل.

لو المساحة كبيرة

 

  • استعمل الالوان الفاتحة سواء فى الدهان او الفرش عشان تعطيك احساس اكتر بالاتساع وكمان بالراحة.
  • تقدر تعمل الارضية نجيلة عشان تعمل منظر جميل.
  • تقدر تعمل برجولة تتناسب مع مساحة البلكونة وتغطيها بالزرع وتحط ترابيزة وكراسى وتكون دى قعدتك فى الفطار والعشاء.
  • ممكن تستعين ببعض المكملات زى الكنبة الارجوحة والكراسى الهزاز والكراسي الفوم Bean bag عشان تقعد عليهم وقت الراحة.

لو المساحة صغيرة

 

  • استعمل الالوان المبهجة والفاتحة عشان تعطي ايحاء باتساع المكان.
  • ممكن تعمل ارفف على الحوائط عشان تستغل المساحة ، وتقدر تحط عليها اى حاجة بتحبها زى الزرع او الكتب او المشغولات اليدوية.
  • استعمل لمبات واضاءة عالية عشان تعطى اتساع للمكان وممكن تعمل وحدات اضاءة مخفية تقدر تستخدمها وقت الليل.

عناصر الديكورات الخارجية

الأثاث والفرش

فرش الحديقة او البلكونة فى بيتك
Photographee.eu/stock.adobe

يفضل ان تختاره من خامات تتحمل التغيرات الجوية عشان متتأثرش بالحرارة والرطوبة وكمان الهواء ، واكيد لو هتعمل أثاث من الخشب يبقى لازم تزود الكراسى بمخدات من القماش او الجلد عشان تكون مريحة فى القعدة وكمان سهلة التنظيف ، وتقدر تعمل اثاث ثابت من الرخام او الحجر لو مش بتحب التغيير.

انواع الجلسات الخارجية

  • جلسات من خشب الارو وطبعا خشب الارو بالذات لانه معروف بقوة تحمله للظروف الخارجية زى المياه والرطوبة وعشان كده بعض الناس بتفضل انها تعمل به مطابخ.
  • اثاث معدنى وده طبعا موجود منه الاستانلس والالومنيوم والحديد ممكن تختار منه الخامة اللى تناسبك بس طبعا تراعى اهم نقطة وهى تحمل الظروف الخارجية عشان متلاقيهوش تآكل وتعرض للصدأ.
  • اثاث من جذوع الشجر كنوع من التميز والاختلاف بدل شكل الكراسى والكنب التقليدى.
  • البامبو وده يعتبر الاختيار الاشهر فى الاثاث الخارجى لان له قوة تحمل رهيبة جدا اكتر من الخشب العادى وبيعيش عمر افتراضى اطول منه وده هنلاحظه موجود كتير فى المصايف وعلى البحر كمان عشان مش بيتأثر المياه المالحة ولا الرطوبة ، ده غير انه لا بيتمدد ولا ينكمش مع العوامل الجوية الخارجية.

الاضاءة

الاضاءة مهمة لعمل ديكورات خارجية
mkos83/stock.adobe

الاضاءة بند مهم لازم تهتم بيها وبأماكن وجودها وشكلها والاستايل بتاعها عشان ده هيأثر على شكل الديكور النهائى تأثير كبير جدا يعنى تقدر تحط فوانيس او شموع وكمان تعمل اضاءة مخفية فى بعض الاماكن بالوان هادية عشان تعمل جو دافى وجميل.

ممكن تركب اعمدة اضاءة من الارض نفسها وطبعا تعمل حسابها فى تأسيس الكهرباء او تضيف فانوس او ابليك على الحوائط او عمود طويل لو الممر طويل مثلا او ممكن اضاءة فى درجات السلم او فوانيس على السور لو كان عندك فيلا لها سور مثلا.

مصادر الصور

الغلاف Paul Bradbury/gettyimages

مواضيع ذات صلة

Leave a Comment