ازاى تختار افضل انواع الرخام اللى تناسب استخدامك
  • Save

Last updated on أغسطس 22nd, 2023 at 04:35 م

من اكثر واهم الحاجات اللى بتشغل بالك وانت بتجهز بيتك سواء بتفكر فى سلم او واجهة او ارضية او كاونتر مطبخ وتسأل نفسك يا ترى ايه افضل انواع الرخام اللى تنفع لكل الأغراض دى ويكون شكله حلو ويتحمل وكمان سهل التنظيف والتلميع.

الرخام حاجة اساسية فى كل مطبخ مهما كان مساحته مفيش غنى عن استخدامه بالنسبة لست البيت وفيه منه انواع كتير وكمان اسعار مختلفة والوان متعددة.

نشأة الرخام وتكوينه

نشأة الرخام والصخور الطبيعية
  • Save

كلنا عارفين الرخام وبنشوفه بقالنا سنين لكن هل فى مرة وقفت وسألت نفسك هو ازاى موجود كده او بيجى منين ؟ الرخام الطبيعى ده اتكون من ملايين السنين وقت ما كانت الأرض عبارة عن كتلة من الغازات المعدنية ، الغازات دى بدأت تبرد ويتم ضغطها وتحولت الى كتل صلبة وتكونت الارض بالشكل اللى احنا شايفينه عليها دلوقتى.

في أثناء العملية دى اتكونت الاحجار الطبيعية اللى منها الرخام واختلفت اشكالهم بناء على نوع المعدن الموجود فى الوقت ده ، العملية دى مش سريعة ابدا بالعكس، دى اخدت ملايين السنين.

ولما الأرض بدأت فى الاستقرار معظم طبقات الصخور دى ظهرت على سطح الأرض نتيجة الضغط والحرارة الموجودين فى باطن الأرض وظهر لنا الأحجار بالشكل اللى احنا شايفينه عليها دلوقتى.

الاحجار الطبيعية هنلاقيها فى كل مكان فى العالم وبيختلف النوع الموجود على حسب نشأته الاصلية ، هنلاقى محاجر رخام وجرانيت وانواع كتير فى امريكا وايطاليا وكندا والمكسيك وتركيا والبرازيل ومصر وغيرها كتير وعشان كده بعض البلاد هتلاقى فيها انواع كتير من الاحجار والبعض هتلاقى فيه انواع اقل.

تنقسم الاحجار الطبيعية لأنواع كتير منها الرخام والجرانيت ودول هنتكلم عنهم بالتفصيل.

ينقسم الرخام نفسه على حسب النقاء والصلابة وسمكه وتركيبه الكيميائي الى نوعين رئيسيين رخام طبيعي ورخام صناعى :

انواع الرخام الطبيعي

ده بيستخرج من الارض خام وبيتكون نتيجة العوامل الطبيعية وبيخرج بعدة ألوان على حسب درجة الشوائب فيه يعنى مثلا الابيض ده بيدل على انه خالى من الشوائب لانه من حجر نقى انما باقى الالوان بتكون نتيجة بعض الشوائب فيها بنسب متفاوتة وله تصنيفات كتير منها :

التصنيف الكيميائي

انواع الرخام من حيث التصنيف الكيميائى
  • Save
Grafvision/stock.adobe

رخام الدولوميت

صخر دولوميت طبيعى
  • Save
dmf87/stock.adobe

ده رخام يحتوى على نسبة زائدة من مادة كربونات الكالسيوم والماغنسيوم وده هنلاقيه اكتر فى الصخور الرسوبية عشان كده فى منه درجات الوان كتير على حسب نسبة وجود المادة فيه واشهر ألوان متوفرة منه الأبيض والرمادي والوردي.

رخام حجر الحية

يحتوى على نسب متفاوتة من الشوائب الطبيعية وده بيخلى لونه مختلف ما بين اللون الوردي والرمادي وفيه نسبة كبيرة من معدن السربنتين وده اللى بيخليه صلب وقوى فى الوانه يعنى مش بيبهت بعد فترة.

رخام الكالسيت

صخور الكالسيت
  • Save
Henri Koskinen/stock.adobe

ده رخام يشبه رخام الدولوميت فى الشكل الى حد ما ولكن التركيبة مختلفة، بيتكون من مادة الكالسيت اللى هى عبارة عن كربونات كالسيوم وده هنلاقيه موجود بكثرة فى الصخور النارية والمتحولة والرسوبية وكمان بيحتوى على 5% منه كربونات ماغنسيوم، ونتيجة الاختلاف فى تكوينات الصخور هنلاقى منه الوان كتير زى الاصفر والابيض والوردى والبني.

رخام العقيق

العقيق من التحف الفنية
  • Save
anastasiapelikh/stock.adobe

الرخام ده معروف بشفافيته ولونه النقى وده لانه بيحتوى على مادة كربونات الكالسيوم ومنتشر باللون الاخضر والاصفر وكمان البنى واكتر حاجة بتميزه هى تركيبة طبقاته الشفافة واللى بتخلى شكله مميز ونادر عشان كده هتلاقيه من التحف.

رخام ترافرتين

صخور الترافرتين
  • Save
Gennadiy Iotkovskiy/stock.adobe

النوع ده تكون نتيجة مياه الفيضان لما طلعت على الحجر الجيري وسابت ترسبات، لما جفت الترسبات دى خلفت ورارها مادة أكثر كثافة وهى رخام الترافرتين.

من مميزات رخام الترافرتين انه قوي جدا وصلب وبيتميز بخفة وزنه لدرجة ان بعض الناس بتفضل تشتغل بيه اكتر من باقى انواع الرخام والجرانيت وعشان كده بيستخدم فى الارضيات والحوائط ، ويتميز بعمره الافتراضي الطويل حتى أن علماء الجيولوجيا قالوا انه ممكن يوصل 50 سنة مع المحافظة عليه.

رخام اخضر بعروق أو يسمى رخام سربنتين

يحتوى على نسبة كبيرة من معدن السربنتين بشكل كتل وهو من اكتر الانواع صلابة ويعتبر هو مصدر الماغنسيوم والاسبستوس وبيستخدم كرخام للشكل الجمالي.

انواع الرخام حسب الشكل

رخام صنى

رخام صنى مصرى المنشأ من انواع الرخام المنتشرة فى الواجهات
  • Save

منشأه مصرى وده من اكتر الانواع المميزة وبيستخدم فى واجهات القصور والارضيات وفى السلالم وكمان مداخل البيوت ، بيعطى احساس بالفخامة والرقى بس عيبه ان فيه تشققات بسيطة.

رخام كرارة ابيض

رخام كرارة ابيض
  • Save

ده النوع المستخدم فى تركيب الاحواض وخاصة فى بلاد الخليج العربى وبيكون اسمها المغاسل الرخام والارضيات ولونه ابيض لؤلؤى وبيعطى للمكان اناقة ورقى وفيه منه بخطوط رمادى بشكل عشوائى وفيه بخطوط روز بشكل عشوائى وفيه بخطوط رمادية بشكل مسطر واسمه كرارة مسطر وفيه نوع يميل للرمادى وده اسمه كرارة مرمر تركى وفيه منه ابيض سادة بيسموه بيانكو.

رخام تريستا

رخام تريستا طبيعى
  • Save

ده بيستخدم فى الواجهات سواء داخلى او خارجى وفى السلالم لانه حجر راقى له اشكال كتير ، ويفضل انه يستخدم فى الحوائط الداخلية والواجهات الخارجية لانه من انواع الرخام الضعيفة.

رخام الشيكولاتة

رخام شيكولاتة هندى المنشأ من الانواع المنتشرة فى الاثاث
  • Save

ده يتميز بأنه خفيف الوزن و يتقطع بسهولة وبيستخدم فى السلالم والحوائط والارضيات وكمان الواجهات وبيكون مستورد من الهند.

رخام مللى براون

رخام مللى براون
  • Save

ده بيستخدم فى ارضيات الحمام واحيانا ارضيات المطبخ والحوائط وكمان فى الحوائط الداخلية ويتميز بسعره المعقول عكس الانواع التانية.

رخام الامبرادور

رخام امبرادور بنى
  • Save

ده رخام يتميز بألوانه المتداخلة مع بعض وبيعطى منظر جمالى وعشان كده بيستخدم فى الرسومات الرخامية بس عيوبه انه سهل الكسر وبيظهر فيه حفر مع مرور الوقت.

الرخام الأخضر الهندى

ده بيستخدم فى الأرضيات ، يتميز بألوانه الغامقة لكن عيبه ان عمره الافتراضى مش كبير.

رخام جلالة فص

رخام جلالة
  • Save

من اكثر انواع الرخام انتشارا في السوق ويستخدم فى السلالم والحوائط والارضيات لان سعره رخيص لكن عيبه انه بينقر وبتظهر فيه حفر بعد فترة قريبة من الاستخدام.

رخام زعفران

بيستخدم في الحوائط والأرضيات والسلالم وله الوان كتير ويتميز بجودته العالية لكن بيحتاج رعاية باستمرار.

رخام روزا البرتغالي

رخام روزا البرتغالى من انواع الرخام القوية
  • Save

يتميز بقوته وصلابته ويستخدم فى السلالم والأرضيات بكثرة.

الرخام الأسود الهندى

ده من اجود انواع الرخام الطبيعى لان حجره سميك وصلب عشان كده بيتحمل درجات الحرارة العالية بدون ما يتشقق ولا يحصل فيه حفر ومش بيتاثر بالصبغات وبالتالى مش بيسيب بقع وله قدرة كبيرة على التحمل زى الجرانيت وشكله مميز وله لمسة قيمة وبريق خاص عشان كده بعض الناس بتستخدمه فى المطابخ.

انواع الرخام الصناعى

ده حجارة رخامية بتتصنع من خليط من المواد الكيميائية وبتكون مكونة بشكل أساسي من بودره بتتخلط مع ألوان صناعية متأكسدة في ظروف صناعية خاصة وبعدين تتصب فى قوالب عشان تجف وبتستخدم في صناعة الأرضيات واطقم الحمامات و تصنيع المغاسل الرخامية واستخدامات الديكور بشكل عام.

اللى بيميز الرخام الصناعي عن الطبيعي ان له خصائص فيزيائية مختلفة عنه وده من حيث التمدد والانكماش والصلابة وكمان ممكن تعمل منه الوان حسب الطلب وفيه منه 3 انواع اساسية :

رخام الاكريليك

وده بيسمى في لغة السوق الكوريان بيتصنع بشكل أساسي من مادة الاكريليك ودى مادة بتستخدم كمادة لاصقة مع بودرة ألومنيوم وده اكتر نوع منتشر لأنه صديق للبيئة لكن عيبه انه يتأثر بسرعة بدرجات الحرارة العالية.

رخام البوليستر

ده بيتصنع من مادة البوليستر او الاكريليك اللى بيتم تعديله وبيتصنع بنفس طريقته بس بيكون اقل منه فى الجودة ولونه بيميل للاصفر ، عيبه انه سهل الكسر وله رائحة قوية ونفاذة.

رخام الجير

بيتصنع من مادة كربونات الكالسيوم وده موجود بالتحديد فى الصين بسبب قلة تكلفته.

الجرانيت

هو فى الاصل من الصخور النارية اللى اتعرضت للماجما او اللافا اللى هى الحمم البركانية و تغيرت تركيبتها نتيجة التعرض لمعادن كثيرة، هنلاحظ انه موجود فى البلاد اللى فيها نشاطات بركانية كتير ومتوفر بالوان كتير جدا منها الاسود والبنى والاحمر والابيض وغيرهم كتير.

يعتبر هو الاختيار المثالى للمطبخ والحمام فى الحوائط وحتى فى تصنيع الأحواض أو المغاسل عشان قوته وصلابته ده غير انه مقاوم للبكتيريا.

مميزات الجرانيت

  • مش بيسرب المياه لأن مساماته ضيقة جدا.
  • مش بيتكسر ولا بيتلف بسرعة.
  • ميتأثرش بمرور الوقت وده بعكس انواع الرخام العادية.
  • سهل التنظيف وله الوان كتير.
  • يتحمل درجات الحرارة العالية.
  • مش بيتأثر بالرطوبة وده بيفرق جدا لو المطبخ خشب.
  • مش بيظهر فيه بقع بسهولة.
  • بيعطى للمطبخ لمسة جميلة ومميزة.

انواع الجرانيت

جرانيت اسود اسوانى

جرانيت اسود اسوانى
  • Save

ده بيستخدم فى المكاتب والشركات والمنازل واهم مميزاته انه مش بيتأثر بالمياه ومش بيتغير لونه مع مرور الوقت وكمان بيتحمل درجات الحرارة العالية بس عيبه ان فيه شقوق كثيرة.

جرانيت فيردى

جرانيت فيردى
  • Save

يتميز بالقوة والمتانة وكمان الصلابة وسهولة التنظيف وبيستخدم فى الممرات والمطابخ والحوائط وفى منه انواع كتير بس مش كلها جودتها كويسة عشان كده لازم تخلى بالك وانت بتشترى.

اسود جلاكسى

جرانيت اسود جلاكسى من اقوى انواع الرخام والجرانيت فى السوق
  • Save

يتميز بالقوة والصلابة وتحمل درجات الحرارة العالية وصعب جدا يتخدش عشان كده بيستخدم فى المطابخ والترابيزات والحوائط الداخلية والواجهات الخارجية وكمان الارضيات ومن ضمن خواصه ان له لمعة عالية جدا وشكله فخم عشان كده سعره غالى.

نيو حلايب

جرانيت نيو حلايب
  • Save

بيستخدم فى نوافير المياه والتماثيل والأواني والفازات و يتميز بصلابته ولونه المميز ، بيستخرج من منطقة حلايب عشان كده منشأه مصرى.

احمر اسواني

جرانيت احمر اسوانى
  • Save

عادة بيستخدم فى الأرضيات لانه مش بيتاثر بالحرائق لكن فيه منه أنواع رديئة جدا لا تصلح للاستخدام.

جرانيت جندولا

جرانيت جندولا
  • Save

ده يتميز بصلابته وجودته العالية وقوة تحمله وكمان الوانه مختلفة ومميزة بس عيبه وجود شقوق كتير فيه وده هنلاقيه بكثرة فى مصر والصين لانهم البلاد المنتجة له.

جرانيت سفاجا

يستخدم فى ارضيات الحمام والمطابخ والحوائط لانه يتميز بسهولة التركيب وسعره مش غالى لكن محتاج رعاية وصيانة كل شوية.

جرانيت غردقة

ده يتميز بقوته العالية وصلابته وصعوبة كسره عشان كده بيستخدم فى الارضيات والمطابخ لكن عيبه وجود شقوق كتير داخله.

جرانيت سعودي

ده يتميز بدقة التصنيع والمتانة والصلابة وفيه منه الوان كتير زى الابيض الحليبي المنقوش بالاسود او اللون الكريمى المنقط بالاسود واسود منقط ابيض ولون الصحراء البنى وفى منه لون احمر ملكى.

جرانيت صيني

ده بيعد من اشد الانواع منافسة فى السوق عشان بيصنف انه ممتاز فى الصنع وكمان سعره اقل من انواع الجرانيت الثانية وفيه منه الوان كتير زى الرمادي المنقط والزهرى المنقط والكريمي المنقط.

نصائح وانت بتختار انواع الرخام فى المطبخ

اختر اقوى انواع الرخام او الجرانيت فى كاونتر المطبخ
  • Save
  • وانت بتختار رخام المطبخ لازم يكون متناسب مع ديكور مطبخك عشان الشكل يبقى جميل.
  • اختار سمك عريض مش رفيع عشان تبقى قدرته عالية على التحمل.
  • لا يفضل انك تستخدم رخام عادى لكن استخدم جرانيت لانه مش بيتأثر بالحرارة ولا بالبقع بسبب السوائل وكمان سهل التنظيف.
  • اختار متخصص عشان يحدد لك مكان الرخام قبل ما تركبه ويركبه لك بشكل صحيح.
  • بلاش تركب قطع رخام كتير فى المطبخ عشان ميقللش مساحة المطبخ.

تنظيف الرخام

تنظيف الرخام او الجرانيت باستمرار
  • Save
sturti/istockphoto

عملية التنظيف سهلة وبسيطة عن طريق مياه وعليها شوية خل عشان تنظف الرخامة من البكتيريا الموجودة عليها وعلشان دايما يكون نظيف ميتعبكش اتبع النصائح دى:

  • متقطعش الخضروات والفاكهة عليه لان التقطيع بالسكينة مع الوقت هيعمل تجريحات كتير وهتضطر ان تعمله جلى وتلميع كل فترة عشان تحافظ على شكله.
  • لو وقع عليه بقع زيت او دهون لازم تتشال بسرعة لان الرخام مادة مسامية تمتص اى سوائل وبتظهر عليها.
  • استخدم فى التنظيف قماشة ناعمة مع المياه السخنة والخل عشان ميحصلش خدوش.
  • لو عايز لمعته تظهر ممكن تستخدم جهاز تلميع الأسطح اللامعة اللى بيستخدم فى تلميع السيارات مع بودرة تلميع وتمسح بها.

مصادر الصور

الغلاف StudioDin/stock.adobe

One thought on “انواع الرخام وازاى تختار النوع المناسب لاستخدامك

  1. مصنع الكوبرا للرخام الذي تتجاوز خبرته ثلاثين عاماً بفضل الله وتوفيقه هو من أشهر المصانع المصرية في إنتاج الرخام والجرانيت عالى الجودة و إستخدام أحدث الماكينات المستخدمة في مجال الرخام والجرانيت والكوبرا من المصانع الرائدة فى مجال قص وتشكيل الرخام والجرانيت فى مدينة القاهرة بجمهوريه مصر العربية. كما أننا نقوم بإستيراد أحدث وأجود أنواع الرخام والجرانيت المستورد من الهند,ايطاليا, تركيا, اسبانيا, وغيرها من دول العالم .
    نتميز باكبر تشكيلة من سرر الووترجيت, البرامق, الانترلوك والحفر على الرخام وإنتاج أشكال زخرفية حديثة ولوحات فنية بديعة.

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *