كيف تختار الوان متناسقة للشقة
  • Save

Last updated on أغسطس 22nd, 2023 at 05:19 م

كتير اتكلم عن الالوان وازاى تختار الوان متناسقة للشقة لكن هل فعلا الموضوع بسيط لدرجة انك ممكن تستعين بعامل يظبطهولك وانت واقف معاه ، او تجمع شوية صور من النت تعجبك وتخلى النقاش يشتغل على اساسها.
لا طبعا الموضوع اكبر من كده بكتير، الالوان بتأثر علينا كل يوم واحنا موجودين فى البيت وحتى بره.

اهمية اختيار اللون المناسب

اهمية تناسق اللون للراحة النفسية
  • Save

تعالى مثلا تخيل معايا وانت قاعد على شاطىء البحر وقت الشروق الصبح وضوء الشمس لسه مظهرش بكامل قوته هتشوف درجات الوان زرقاء هادية جدا ده نتيجة انعكاس الضوء على المياه، نفس الوضع لما تقعد ساعة الغروب وتشوف الشمس وهى لونها برتقالى هتحس بدفء حتى لو كنت فى الشتاء.

طب ده بالنسبة لقعدة مدتها ساعة ولا اتنين طب تفتكر ايه كمية التأثير على الوان بيتك اللى انت مقيم فيه 24 ساعة اكيد الموضوع مهم جدا محتاج تفهم ابعاده.

مفيش قوانين للالوان ترتبط بالاماكن

اختر اللون المريح بالنسبة لك ولا ترتبط بلون معين لمكان محدد
  • Save

اكتر جملة مملة واللى خلت بيوتنا كلها شبه بعض تقريبا لما تسال حد اعمل ايه “الوان متناسقة للشقة” يقولك “احسن لون في الريسبشن بيج مع بنى واحسن لون لغرفة الأطفال البينك او السماوى والصالون يكون بنى او نبيتى مع الذهبى” ياجماعة مفيش حاجة اسمها ده احسن لون للغرفة دى.

لازم تشوف انت مرتاح في الوان ايه وتعملها عندك واحب اقولك معلومة جميلة في النقطة دى شوف انت بتحب تلبس الوان ايه وخلى اوضتك بالألوان دى لان ده مبنى على ارتياح نفسى ليك.

ازاى تختار اللون بنفسك بكل سهولة

الاختيار من عجلة الالوان
  • Save

عشان تلغى رهبة اختيار اللون ومتبقاش متردد وخايف هنوضح لك السر وراء اختيار اى لون وهو عجلة الألوان.

اساسيات عجلة الألوان

الالوان الاساسية فى العجلة
  • Save
الالوان الثانوية فى العجلة
  • Save
الالوان فوق الثانوية فى العجلة
  • Save

بتتكون العجلة من 12 لون تعالوا نشوف هما عبارة عن ايه.
زى ما اتعلمنا زمان في مادة التربية الفنية ان الألوان الأساسية في الطبيعة هما 3 الوان الأصفر والاحمر والازرق.

يجى بعدهم الألوان الثانوية بردو 3 الوان وهما اللى نتجوا عن خلط الألوان الأساسية ببعضها وطلع لنا البرتقالى من خلط الأحمر والاصفر والموف من خلط الأحمر والازرق والاخضر من خلط الأصفر والازرق.

بعد كده نتج عندنا الوان تانية اسمها فوق الثانوية لكنهم 6 الوان ودول نتجوا عن خلط كل لون اساسى باللون الثانوى اللى بعده في العجلة وطلع لنا برتقالى مصفر وبرتقالى محمر وموف محمر وموف مزرق واخضر مزرق واخضر مصفر.

أنظمة اختيار الألوان من العجلة

عجلة الألوان مجرد أداة بسيطة لاختيار ديكور بيتك لكن قبل ما تعرف الاختيارات الشائعة لازم تخلى بالك ان (الأزرق – الاخضر – الموف) درجات باردة يعنى هادية و (الأحمر – البرتقالى – الأصفر – البنى – البينك) الوان سخنة بتعطى طاقة فتخلى بالك من المكان اللى هتختار لونه عايزه يكون اى اتجاه فيهم.

نظام احادى اللون

نظام احادى اللون مناسب للاماكن الهادئة
  • Save

لو كنت مش حابب تخلى غرفتك مليانة الوان كتير ممكن تاخد لونك المفضل في اللبس مثلا اختاره من العجلة وهات درجاته المختلفة الافتح منه شوية والاغمق منه شوية هتلاقى نفسك خرجت بنتيجة كويسة.
بس طبعا مينفعش مكان كله بلون واحد يعنى مثلا لو اخترت لون بارد يبقى لازم تطعمه بلون تانى سخن معاه عشان ميبقاش المكان ممل.

نظام اللون المماثل

الوان متناسقة للشقة من خلال اختيار نظام اللون المماثل
  • Save

لو بتحب البساطة وملقتش في النظام احادى اللون الاختيار اللى يرضيك يبقى اللون المجاور اختيارك الصح، هتجيب لونين او 3 الوان متجاورة من العجلة وهما اللى هيتوزعوا على الغرفة.
احسن قاعدة تتبعها وانت بتوزع الوانك هي قاعدة 60-30-10 يعنى ايه؟ يعنى 60% لون مسيطر على المكان و30% لون ثانوى يكسر الدرجة دى و10% لون تأكيدى لاظهار العناصر الموجودة زى الاكسسوارات مثلا.

نظام اللون المكمل

اختيار الوان متناسقة للشقة عن طريق الالوان المكملة على العجلة
  • Save
Ume illustration/shutterstock

زى ما احنا عارفين ان التضاد بيقوى ويظهر هو ده بالظبط اللى انت هتعمله من عجلة الألوان وانت بتختار في النظام ده هتشوف اللون اللى يعجبك وتاخد اللون المقابل له فى العجلة زى مثلا الأزرق مع البرتقالى او الموف مع الأصفر او الأحمر مع الأخضر.

نظام الالوان الثلاثية

نظام الالوان الثلاثية على شكل مثلث من العجلة
  • Save

لو كنت جرىء فى اختيار الوانك هتقدر تختار بالنظام ده، طريقته بسيطة جدا عبارة عن 3 خطوط كل خط يلمس لون من العجلة هتطلع بـ 3الوان ماشيين مع بعض واقل حدة من التضاد الموجود فى النظام المكمل.

اختيار ألوان الغرفة

اختر اللون من القطع المفضلة عندك
  • Save

لو مسكت كتالوج الوان او كرتلة وجيت تختار الوان عشان تعمل اوضة بتلاقى فيه رهبة شوية ياترى الألوان دى هتظبط مع بعض ولا مش هتبقى كويسة طب افتح ده ولا اغمق التانى.

كمية الألوان الموجودة ماهولة مش مجرد شوية الوان أساسية بتختار منهم فيه درجات بينية لكل واحد منهم عايز تعرف ازاى، روح اى محل دهانات واسال البائع عايز اتفرج على اللون الأبيض هيرد عليك عايز ابيض حليبى ولا مزهر ولا ابيض ثلجى ولا كريمى وهتسمع كلام كتير اوى.

عشان تختار الوان للغرفة ومتتعبش كتير شوف الغرفة دى هل فيها لوحة فنية كبيرة على حيطة معينة مثلا هتكون هي نقطة الارتكاز او سجادة مهمة بالنسبة لك وعايز تخليها في الغرفة دى، خد النقطة دى سواء كانت اللوحة او السجادة او حتى اى قطعة تانية واستوحى منها ألوان الغرفة.

هات اللون الاساسى في القطعة وابتدى ظبط الباقى بناء عليه طب لو كنت بتبدأ من الأول خالص ومفيش عندك قطعة تاخد منها الوان يبقى هتشوف لونك المفضل وتبنى على أساسه باقى الألوان، زى بالظبط لما تختار طقم تلبسه بتشوف مثلا تى شيرت تحبه وتختار بنطلون يناسبه نفس الموضوع بالظبط بالنسبة للدهان.

السر ورا تركيبات الالوان الرائعة

الطبيعة هى اجمل مصدر للالوان المتناسقة
  • Save

لما نيجى نتكلم عن تركيبات الالوان نلاقى شوية حاجات نمطية اتعودنا عليها مثلا زى الازرق والابيض كتركيبة معتادة شفناها كتير، لكن عشان تعطيه لمسة عصرية جديدة ممكن تدخل معاه اصفر لمونى او اخضر مبهج.

بردو من ضمن اختيار الوان متناسقة للشقة ممكن كحلى مع برتقالى غامق كلون مكمل ليه تستخدمه مثلا فى الكنبة او الركنة واحنا وضحنا يعنى ايه لون مكمل لما اتكلمنا عن عجلة الالوان.

عشان تشوف تركيب الالوان الصح اللى زى ما بنقول مفيش فيه غلطة بص للطبيعة هتلاقى الورق الاخضر للشجر بلونه المشبع ومعاه درجات البنى فى جذع الشجرة، ثمرة اليوسفى مثلا تلاقى لونها برتقالى مشبع والورق لونه اخضر هادى.

ده يعتبر المفتاح السحرى لعمل الوان متناسقة ولو ركزنا اكتر هنلاقى ان معظم بيوت الازياء العالمية اخدت المفهوم ده واشتغلت عليه كويس جدا وعملوا تصاميم الازياء والموضة بنفس المفهوم.

اختيار لون الدهان

اختيار الوان متناسقة للشقة عن طريق تجربة اللون فى الغرفة
  • Save
PH888/shutterstock

نيجى بقى للخلاصة اللى هتعملها عشان تخلص موضوع الوان الشقة، لو شوفت صورة من الانترنت وجيت تنفذها عندك هتبص تلاقى اللون طلع شوية مصفر او ازرق زيادة وممكن يطلع نفس الدرجة لكن لونه على الاوضة مش حلو ده سببه ايه.

انك شفت الصورة بوضعها اللى متصورة عليه شكلها حلو جدا وفكرت انها هتطلع عندك نفس الوضع لا طبعا ده غلط ليه بقى لان هناك فيه كمية اضاءة معينة داخلة الاوضة هل كمية الاضاءة عندك نفس الكمية دى ولا اقل؟ هل الشباك اللى عندك كبير زى اللى فى الصورة اللى شفتها؟ اكيد فيه حاجات مختلفة وده اللى بيخليك محبط ومتضايق ان اللون مش عاجبك فى شقتك رغم انه ان عاجبك فى الصورة.

طب ايه الحل؟ بسيط جدا ممكن تجيب قطعة خشب MDF مدهونة ابيض مقاس 60 سم * 60سم وتشترى كمية بسيطة من الدهان اللى انت عايزه وليكن ½ كيلو كتجربة وتدهن قطعة الخشب دى وتسيبها لحد ما تنشف فى الاوضة وتشوف شكلها ايه فى كل اوقات اليوم بالنهار وباليل وطبعا لازم تبدلها على كل الحوائط عشان تشوف لو كان شكلها مش حلو على حيطة معينة او محتاجة تتفتح شوية او تتغمق ولو عجبتك على كده يبقى تمام انت نجحت وجبت الوان متناسقة للشقة.

مصادر الصور

الغلاف Lifestyle Travel Photo/Shutterstock

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *