استغلال المساحات الضيقة فى شقتك

استغلال المساحات الضيقة

لو انت بتجهز بيتك سواء شقة قديمة او جديدة ومحتار عشان المساحة ضيقة مش عارف ترتب الفرش بتاعك ازاى ، خايف الشقة تطلع شكلها وحش احنا هنقولك على مجموعة حيل بسيطة فى استغلال المساحات الضيقة عشان تنسق شقتك بشكل كويس وفى نفس الوقت تكون منظمة وجميلة.

استغلال المساحات الضيقة فى شقتك الجديدة

 

الوان الدهانات

استغلال المساحات الضيقة بالالوان الفاتحة

اول واهم نقطة وتقريبا كل الناس عارفاها فى موضوع استغلال المساحات الضيقة هو الوان الدهانات الفاتحة دايما بتخلى شكل الغرفة واسع وبتعطى مساحة اكبر زى الابيض والازرق الفاتح والكريمى وابعد تماما عن الالوان الغامقة لانها بتضيق المكان وبتحد من الرؤية ، كمان ياريت لو الالوان تكون موحدة يعنى الاوضة كلها تكون لون واحد ويكون اللعب فى حاجات تانية هنقولها دلوقتى.

الاكسسوارات

استغلال المرايات لاظهار المساحة

ابعد تماما عن الاكسسوارات الكبيرة او اللى ليها الوان كتير خليك فى الاكسسوارات المعلقة و البسيطة وطبعا يستحسن انها تكون بنفس الوان المكان او الوان مكملة ليها ، ومن اكتر الاكسسوارات اللى هتساعدك فى استغلال المساحات الضيقة وتعطى مساحة كبيرة هى المرايات لانها بتعمل انعكاس لكل الحوائط وبالتالى توسع المكان ، وممكن تستغل الزوايا والاعمدة فى الشقة وتعمل ارفف خشبية وعليقات ودى فكرة بسيطة جدا وفى نفس الوقت تعطى لمسة جمالية مش هتكلفك كتير .

دور الاثاث والفرش فى استغلال المساحات الضيقة

مينفعش تكون المساحة ضيقة وتجيب اثاث حجمه كبير او ضخم ، استغل كل ركن فى الشقة استغلال صح وده ليه افكار كتير اوى كمان الوان الفرش تكون فاتحة وممكن الوان صارخة بتعطى احساس بالبهجة والاتساع زى ما هنشوف فى الامثلة دى :

  1. منطقة الليفنج

    استغلال المساحات الضيقة فى غرفة المعيشة

    اشترى كنب بسيط او انتريه صغير وممكن تستغنى عنهم وتجيب كراسى حجمها معقول ، كمان بدل ترابيزة السفرة استبدلها بترابيزة للانتريه تتقفل وتتفتح وتشتغل انتريه وسفرة و مش بتاخد مساحة وتقدر تنقلها من مكان لمكان بكل سهولة وبلاش تعمل مكتبة خاصة بالتلفزيون تضيع مساحة الليفنج وتحسسك بضيق المكان وخليه معلق على حامل ثابت او متحرك واعمل ارفف لترتيب الكتب والمجلات عليها وبكده تبقى عملت استغلال المساحات الضيقة بشكل كويس اوى .

  2. استغلال المساحات الضيقة فى غرفة النوم

    الاستغلال الامثل للسرير بالتخزين عن طريق ادراج سفلية
    Scott-lee/shutterstock

    اشترى سرير يحتوى على ادراج تستخدم لتنظيم الفرش او الملابس او اى متعلقات تانية تحب تخزنها فيهم كمان بلاش كومود واستبدله بارفف جانبية ونفس الوضع بالنسبة للتسريحة عشان توفر مساحة اكتر.

  3. غرفة الاطفال

    توفير المساحة الغرفة بسرير دورين
    Scott-lee/shutterstock

    يستحسن ده لو مكانش لازم يكون السرير بدورين ولو الاطفال اكتر من اتنين اشترى كنبة تتحول لسرير وفى الركن اعمل مكتبة معلقة بالارفف لتخزين كتب الاولاد والعابهم كمان سلم السرير يكون فيه ادراج لتخزين الملابس والاحذية.

    وممكن تستبدل المكاتب بترابيزات تتفتح وتتقفل يكون ليها اكتر من استخدام زى المذاكرة او مكان للكمبيوتر واجهزة اللعب وهنا ممكن تشوف الموضوع ده عن افكار لتنظيم غرفة الاولاد بشكل أحسن.

تجهيز المطبخ

استغلال المساحات الضيقة فى المطبخ المفتوح

كتير من مصممين الديكور بيشوفوا ان فكرة الفصل بين المطبخ والليفنج مش حلوة خصوصا فى المساحات الضيقة يعنى فتحهم على بعض بيعطى اتساع لمساحتهم الاتنين وممكن تفصل ما بينهم بترابيزة او بار صغير لتناول الطعام وممكن تشوف تفاصيل كتير عن الاستفادة من انواع المطابخ و مميزات المطبخ المفتوح فى النقطة دى.

الستائر والسجاد

استغلال المساحات الضيقة بالسجاد الفاتح

ابعد تماما عن الالوان الغامقة او المزخرفة لان تفاصيلها كتير جدا هتاخد عينك وانت قاعد وهتحس بالتشتت واستبدلها بالوان هادية وبسيطة وبرسومات اكتر نعومة يعنى يكون تفاصيلها اقل ويستحسن تكون الستائر قريبة من السقف لانها بتعطى احساس بارتفاعه وكبر مساحة الشباك.

الاضاءة

الاضاءة القوية تظهر تفاصيل المكان

الاضاءة عامل مهم جدا لاظهار المكان وبيان تفاصيله وكل ما كان التوزيع كويس والاضاءة عالية هيكون المكان شكله اجمل بكتير عن الاضاءة الضعيفة او الخافتة ، كمان الاضاءة الجانبية للكنب والاثاث (اباجورةلامبادير) بتعكس مظهر جميل.

الابواب والشبابيك وتأثيرها على استغلال المساحات الضيقة

الاستغلال الامثل للمساحات الضيقة بباب جرار

استخدم الابواب الجرار (السحاب) بدل الابواب العادية لان طبعا الجرار مش بياخد مساحة للفتح المفصلى ، يعنى مثلا مش هتحتاج متر فاضى قدام الباب عشان تقدر تفتحه ، وممكن تعملها بنفس لون الحيطة كمان وجود الشبابيك الزجاجية بيعطى احساس بالاتساع وفرصة لدخول الاضاءة الطبيعية ويفضل انك تخلى الشباك كبير.

وممكن تستعين بأبواب الاكورديون الداخلية او الخارجية على الحديقة او البلكونة ودى من الحلول الذكية جدا للتعامل مع المساحات الضيقة ، لانها مش بتستغل اى مساحة لفتحها ، لكنها تعمل بطريقة الطى والفرد.

الارضيات

الارضيات الفاتحة تظهر اتساع المكان

استخدم الباركيه او السيراميك الفاتح بلون واحد ومن غير سجاد بهدف استغلال المساحات الضيقة فى المكان ، لان السجاد طبعا بيعطى دفء واحساس ان ملامح المكان قريبة منك مش مفتوحة.

استغلال المساحات الضيقة فى شقتك القديمة

  • اعادة تنظيم المكان شوف مكان كل حاجة مناسب ولا محتاج تغيير كمان الاثاث الكبير بيعه مستعمل واشترى غيره بس يكون ابسط واخف منه.
  • تخلص من الكراكيب والاشياء القديمة ، اوقات كتير بنحتفظ بالحاجة بهدف استغلالها بعدين او بشكل تانى واوقات بنحتفظ بيها لمجرد ارتباطنا العاطفى بوجودها او ذكرياتنا معاها وده بياخد مساحة كبيرة من الشقة ملهاش فايدة ، فالحل إنك تتخلص منها سواء كانت اجهزة او اثاث او ملابس او حتى كتب دراسية و مجلات بالبيع او التبرع بيهم.
  • جدد ألوان الفرش القديم بألوان جديدة فاتحة وعصرية.
  • احتفظ بالعاب الاطفال فى سلة كبيرة فى ركن الغرفة بدل توزيعها على المكتبة والارفف.

مواضيع ذات صلة

Leave a Comment