افضل الطرق لترتيب اجهزة المطبخ

ترتيب اجهزة المطبخ عشان سهولة الاستخدام

[lwptoc]

ترتيب اجهزة المطبخ يعتبر تحدي كبير بالنسبة لنا واحيانا بتكون معاناة واحنا واقفين فى المطبخ ، كام مرة والام واقفة بتطبخ و حد من أفراد الأسرة حاول يوصل للثلاجة ومقدرش ، أو وهى بتغسل الاطباق على الحوض تناثرت مياه على البوتجاز وهو شغال ومواقف غير كده كتير تبين معاناة الاسرة بسبب سوء ترتيب اجهزة المطبخ.

وعشان ميكونش فيه ارتباك لازم نحدد احتياجاتنا وبعد كده نعرف ازاى نرتب الأجهزة ، وهنا هنعرض لك بعض النصائح اللى هتمشى عليها وأنت بترتب اجهزة مطبخك ، والنصائح دى منقسمة لجزئين ، جزء منهم أثناء مرحلة تأسيس المطبخ و تصميمه من البداية والجزء الثانى اثناء الاقامة فى البيت.

الجزء الاول اثناء تأسيس المطبخ

 

واحنا فى مرحلة التأسيس ، اجهزة المطبخ اللى يهمنا ترتيبها هى الاجهزة الكبيرة لانها اجهزة الاستخدام اليومى والمسيطرة على المطبخ كله زى التلاجة والبوتجاز وغسالة الملابس والأطباق ، واللى بتحدد أماكن باقى الأجهزة ، وفيه بعض الطرق اللى تضمن لك اماكن مثالية للاجهزة دى.

تقسيم المطبخ لمناطق رئيسية

المناطق الرئيسية الخمسة فى مطبخك
freepik.com/free-photos-vectors/banner

من المهم جدا أن تصميم المطبخ يكون متقسم تقسيم صح عشان يبقى أكثر كفاءة وفعالية ، والتقسيم ده بيكون مكون من 5 مناطق رئيسية:

  1. منطقة تخزين الطعام.
  2. منطقة تجهيز الطعام.
  3. الأوعية والأواني.
  4. مواد التنظيف و سلة القمامة.
  5. الاطباق وادوات الطهى.

اجهزة المطبخ المدمجة Built-in

اجهزة المطبخ المدمجة تساعد فى توفير المساحة
JazzIRT/istockphoto

اثناء تقسيم المناطق الرئيسية هتلاقى الأماكن المناسبة لاجهزة المطبخ الكبيرة ، مثلا البوتجاز هيكون افضل مكان له هو منطقة تجهيز الطعام.

خلى فى اعتبارك دائما الاجهزة المدمجة Built-in في مناطق المطبخ ، لأنها تضيف لمسة جمالية رائعة للمطبخ ده غير توفير فى مساحة كاونتر المطبخ مش هتلاقيه لو الأجهزة عادية.

ومش بس كده دى هتضيف شكل مودرن وعصرى لمطبخك ، زى البوتجاز المسطح بدل البوتجاز التقليدى ، والفرن Built-in المحاط بعلب تخزين من فوق و تحت.

مثلث الحركة بين اجهزة المطبخ

مثلث الحركة بين كل خدمات المطبخ
Rahimov Emin/shutterstock

لو كنت راضي عن تقسيمة مناطق المطبخ ، تقدر فى الوقت ده ترتب الاجهزة الصغيرة بناء على افضل مكان يؤدى الغرض بالنسبة لها.

اثناء مرحلة تأسيس المطبخ او حتى تجديده لازم تخلى بالك من مثلث الحركة ، واللى يشير الى اهم 3 نقط في المطبخ وهم (البوتجاز – الثلاجة – حوض الغسيل) لازم يكون فيه اتصال بين الثلاث نقط دى بسهولة.

مقاسات الاجهزة

 

مقاسات الاجهزة من أهم النقط اللى لازم توضع فى الاعتبار عشان سهولة الحركة ، لو كانت صغيرة أكثر من اللازم مش هتؤدى الغرض منها ، ولو كانت اكبر من اللازم هتضيع مساحة المطبخ ومش هنقدر نستغل باقى المساحة لبقية الاغراض.

افضل طريقة لتحديد أنسب الأجهزة بالنسبة لك هو مدى استخدامك للجهاز ، على سبيل المثال لو كان أفراد عائلتك من هواة المشويات والمخبوزات يبقى يلزمك فرن حجمه كبير ، ولو كان فيه حد بيشرب عصير كل يومين أو ثلاثة يبقى عصارة صغيرة تؤدى الغرض ، وهكذا.

اختيار مكان البوتجاز

اختيار احسن مكان للبوتجاز لوجود التهوية ولتجنب خطر الغاز
D/stock.adobe

من أهم النقط اللى ناخدها فى الاعتبار هو اختيار مكان البوتجاز المثالى بحيث ميكونش متعارض مع مكان إمداد الغاز الطبيعى ، يعنى نحاول نخلي مسافة بينه وبين ماسورة الغاز على الاقل 15 سم عشان الحرارة متكونش مباشرة على الماسورة لان فيها خطورة كبيرة جدا.

كمان نختار له مكان جيد التهوية قريب من شباك وطبعا مننساش الشفاط سواء كان هرمى فوق البوتجاز او حائطى عادى ، ونخلى بالنا ان البوتجاز ميكونش تحت الشباك مباشرة لان كده الشفاط الهرمى مش هينفع يتركب.

اختيار مكان غسالة الملابس والاطباق

 

عشان تكون الاجهزة دى راكبة فى مكانها الصح لازم تراعى أماكن تغذية وصرف المياه ، وده لازم يتم تخطيطه كويس جدا فى السباكة ، وخاصة لو كان عندك غسالة اتوماتيك لها باب علوى ، وكلنا عارفين ان بعض الموديلات فى النوع ده من الاجهزة مفيش لها سخان ، يبقى من الضروري انك تركب لها توصيلة مياه سخنة من السخان مباشرة.

الجزء الثانى بعد اقامتك فى المنزل

 

ترتيب اجهزة المطبخ حسب الاستخدام

تقسيم اجهزة المطبخ حسب استخدامك لها
New Africa/shutterstock

أول خطوة لتفادي الفوضى والكركبة فى اجهزة المطبخ هو هو انك تكون عملى وترتبها حسب الاستخدام ، يعني شوف ايه الاجهزة المستخدمة باستمرار والاجهزة اللى استخدامها قليل والأجهزة الغير مستخدمة.

وهل انت فعلا محتاجة توستر للسندوتشات وماكينة الوافل موجودة واللى ممكن تؤدى نفس الغرض ، ولو بصينا على الحلة الاستانلس العميقة المتخصصة فى طهى الارز هل ممكن نحتاج الحلة الكهربائية لطهي الأرز واللى بدأت تنتشر فى بيوت كتير حاليا ، بالتأكيد لا.

وهنا نقدم لك نصيحة مهمة : حاول تشترى اجهزة مطبخ متعددة الاستخدامات لتوفير أكبر مساحة من علب التخزين او كاونتر المطبخ ، ولو هتشترى اجهزة لها استخدام واحد فيكون عددهم قليل.

تخزين اجهزة المطبخ المستخدمة باستمرار

اجهزة المطبخ المستخدمة باستمرار يفضل تخزينها فوق الكاونتر
Thanyakan Thanapanprasert/istockphoto

مفيش قاعدة واحدة مسلم بها لتخزين اجهزة المطبخ ، ولكن ده يعتمد على طريقة الطبخ والأجهزة المستخدمة بكثرة ، وحجم علب التخزين الموجودة.

طيب بعد ما عرفنا الاجهزة اللى احنا محتاجينها طول الوقت ممكن نخزنها فين وايه انسب مكان لاستخدامها ، فيه 3 قواعد ممكن تسهل علينا الموضوع.

  • الاجهزة المستخدمة باستمرار يفضل انها تكون موجودة على الكاونتر الرخام او فى الرفوف السفلية ، بحيث تكون فى متناول ايدك مباشرة.
  • الاجهزة نادرة الاستخدام يفضل انك تخزنها فى العلب العلوية.
  • الاجهزة الغير مستخدمة تبرع بها او ممكن تبيعها على الانترنت او لحد تعرفه.

هو طبعا من الافضل انك تخلى الكاونتر فاضى ونظيف طول الوقت ، ولكن مش هتكون مشكلة لو انك خليت بعض الاجهزة فوق الرخام ، ترتيب المطبخ شامل بنود كتير زى علب التخزين و الثلاجة و التروللى او الدولاب المنفصل.

ولو فيه اجهزة مستخدمة يوميا زى الخلاط او الميكرويف او التوستر ، يبقى افضل حل انك تخليهم مكان استخدامهم على الرخامة ، عشان تقدر توصل لهم بسهولة بدل ما كل يوم تطلعهم وتخزنهم تانى.

الأجهزة نادرة الاستخدام

اجهزة المطبخ نادرة الاستخدام خزنها فى العلب العلوية
Dmitry_Evs/istockphoto

ودى هى الاجهزة اللى بتستخدمها مرة كل 3 أو 4 شهور ، زى ملحق الخلاط الخاص بعمل عصير الاسموزى مثلا ، وآلة صنع الوافل ، ومكنة الايس كريم ، وبردو العجانة لو كانت الام بتعمل كيكة او تورتة وده بيكون فى المناسبات فقط.

كل اجهزة المطبخ دى مش منطقى انك تخزنها على أهم مساحة وهى الكاونتر الرخام او حتى فى العلب السفلية لان فيه اجزاء اهم منها ممكن تتخزن فيها ، ولكن تقدر تخزن الاجهزة دى فى أعلى رف في المطبخ.

خلى بالك ان الاجهزة دى هتتغير أماكنها موسميا ، يعنى مثلا حلة الطبخ بالبخار ممكن تستخدم بكثرة وقت الشتاء ، في حين أن ماكينة صنع الايس كريم هيكون وقتها موسم الصيف ، عشان كده مينفعش الاجهزة دى تكون فى اماكن رئيسية.

استفيد من اجهزة المطبخ الغير مستخدمة

الاجهزة الغير مستخدمة ممكن تبيعها او تتبرع بيها
cybrain/shutterstock

اخفاء اجهزة المطبخ الغير مستخدمة خطوة صعبة لناس كتير رغم أنها مش محتاجة تفكير ، فبعض الاجهزة مش هنستخدمها ، ومش مهم وقتها إن كنا مرتبطين بوجودها فى المطبخ.

يعنى لو بصينا على وعاء سلق البيض ، والعصارة ، وحلة طبخ الأرز الكهربائية ، لو كنا بنستخدم الاجهزة دى فعلا يبقى خليهم موجودين ، أما لو محصلش انك استخدمت الاجهزة دى قبل كده يبقى مفيش فرصة فى المستقبل ان ده هيحصل.

اجهزة المطبخ الغير مستخدمة تشكل عبء على مساحة التخزين عندك ، فى الوقت ده عندك كذا حل ، ممكن تتبرع بها لشخص محتاج أو لمؤسسة خيرية ، أو تبيعها على الانترنت وحاليا بقى فيه مواقع كتير تعرض السلع المستعملة فى بلادنا العربية.

ترتيب علب التخزين العشوائية

ترتيب علب التخزين سواء كانت علوية او ارضية
gerenme/istockphoto

بعد ما قللنا من عدد الأجهزة ، ونزلنا المهم منها على الكاونتر الرخام ، من المهم أننا ننظم العلبة ، عشان نقدر على الاقل نشوف محتوياتها بسهولة ، وعشان نعمل كده فيه مجموعة نصائح ممكن نتبعها :

  • حاول تلف السلك الخاص بكل جهاز قبل ما تخزنه فى العلبة ، لان ده هيخلى الشكل العام جميل جدا ومرتب.
  • اشترى سلم صغير هيخدمك فى اغراض كثير منها انك ممكن تخزن الأجهزة في الأرفف العلوية.
  • احفظ دليل استعمال اجهزة المطبخ على الانترنت على بريدك الشخصى أو أى موقع رفع ملفات ، مفيش داعى اننا نحتفظ بكمية من الورق فى المطبخ تزيده عشوائية.
  • عشان نتجنب الزحمة الناتجة عن ملحقات الخلاط ممكن نخزنها في أكياس بلاستيك ونخليهم فى رف او علبة تخزين عندنا ونكتب عليهم محتوياتهم بملصق صغير.

ترتيب اجهزة المطبخ باستمرار

 

كل ما كان ترتيب اجهزة المطبخ على فترات متقاربة كل ما هيكون اسهل بالنسبة لنا ومش هياخد معانا وقت اطول فى المرة اللى بعدها يعنى مثلا لو جربت تنظم المطبخ مرتين فى السنة هتلاقى الموضوع ابسط كثير ، ولو عايز الموضوع ابسط ممكن تكتب ملصق بمحتويات كل علبة وتلزقه عليها.

مصادر الصور

الغلاف New Africa/shutterstock

مواضيع ذات صلة

4 Thoughts to “افضل الطرق لترتيب اجهزة المطبخ”

  1. >ميكونش تحت الشباك مباشرة لان كده الشفاط الهرمى مش هينفع يتركب.
    ممكن سرح اكثر، ما السبب؟

  2. Mohamed Ali

    بعض الناس تفضل تركيب البوتجاز تحت الشباك وتقوم بتركيب الشفاط المروحة العادى لكن المسألة فى النهاية خاضعة لرغبتك الشخصية وتخطيط العام للمطبخ هناك الكثير من الناس لاتفضل الشفاط الهرمى لضعف أداؤه بالمقارنة بالشفط العادى

    1. Mohamed Ali

      شكرا لتواجدك فى الموقع ونتشرف بالمتابعة

Leave a Comment